Drug den ni-raid: 1 ‘tulak’ patay

BULACAN — Isang manggagawa ng paputok at pinaniniwalaang kasangkot sa pagtutulak ng ipinagbabawal na gamot ang napatay habang nakatakas naman ang dalawang kasamahan nito matapos na makipagbarilan sa awtoridad nang salakayin ang isang pagawaan ng paputok na pinaniniwalaang drug den kamakalawa sa Bocaue, ng lalawigang ito.

Kinilala ni Bulacan PNP Provincial Drug Enforcement Group (PDEG) chief P/Supt. Pedro Ramos ang napatay na suspek na si Ronilo Celis, 32, may-asawa, ng Sitio Dam. Brgy. Binyang 2nd, Bocaue.

Samantalang patuloy na nagsasagawa ng pursuit operation laban sa mga nakatakas na suspek.

Sa inisyal na ulat, dakong alas-5 ng hapon nang isagawa ang pagsalakay sa nasabing pagawaan ng paputok matapos ang may ilang araw na surveillance laban sa mga suspek.

Nang salakayin ang nasabing lugar, sinabi nang pulisya na agad silang pinaputukan ng mga suspek nang makatunog sa isinasagawang raid sanhi upang gumanti ng putok ang awtoridad na humantong sa pagkasawi ni Celis.

Narekober ng pulisya sa pag-iingat ng nasawi ang isang kalibre .38 baril na may bala, mga gramo ng shabu na hindi pa batid ang bilang at drug paraphernalias. (Efren Alcantara)