Security agency pinasabog

Camp Crame – Niyanig ng malakas na pagsabog ang isang security agency makaraang hagisan ng granada ng hindi pa nakikilalang mga armadong lalaki sa Purok 2, Brgy. Sampao, Davao del Norte, ayon sa ulat kahapon.

Sa report, dakong alas - 3 ng madaling-araw nang bigla na lamang hagisan ng granada ang Black Arrow Security Agency sa nasabing lugar.

Ang granada ay tumama sa security outpost ng naturang security agency at lumikha ng malakas na pagsabog dito habang mabilis namang nagsitakas ang mga suspek.

Wala namang naitalang nasugatan at nasawi sa insidenteng ito subali’t lumikha ito ng malaking pinsala sa nasabing security outpost.

Narekober sa pinangyarihan ng insidente ang mga sharpnel ng sumabog na granada at ang kasong ito ay sumasailalim pa sa pagsisiyasat. (Joy Cantos)