Turistang Hapones nilikida sa Batangas

STO. TOMAS, Batangas — May posibilidad na maapektuhan ang turismo sa bansa makaraang mapaslang ang isang 41-anyos na turistang Hapones sa bayan ng Sto. Tomas, Batangas, may ilang oras matapos na lumabas ng hotel kasama ang isa pang turista kamakalawa.

Tama ng bala ng baril sa ulo ang tumapos sa buhay ng real estate dealer na si Takaaki Yushina ng Titoku, Asakusa, Japan na natagpuang nakahandusay sa bahagi ng Barangay San Bartolome.

Base sa ulat na nakarating kay P/Chief Supt. Raul Tacaca, Sto. Tomas police chief, huling namataang buhay ang biktima na lumabas ng Diamond Hotel noong Huwebes ng gabi na kasama ang isa pang turistang Hapones na si Yoichi Muramatsu.

Napag-alamang ibinaba sa taxi ng biktima si Muramatsu sa Robinsons, Ermita, Manila bago nagpaalam na ihahatid ang pera sa kanyang girlfriend pero hindi binanggit kung saan hanggang sa matagpuang patay.

Kasalukuyang sinisilip ng pulisya ang anggulong love affair, pagnanakaw at kaaway sa negosyo matapos na mamataan ng ilang saksi na may dalawang lalaki na mukhang Hapones ang papalayo sa kinakitaan ng bangkay ng biktima may ilang minuto matapos na madiskubre ang insidente. (Ulat nina Arnell Ozaeta at Joy Cantos)