Tinyente ng PNP dakma sa buy-bust

CAMP OLIVAS, Pampanga — Bagsak sa kalaboso ang isang tinyente ng pulisya makaraang masakote ng mga tauhan ng Criminal Investigation and Detection Group at Philippine Drug Enforcement Agency (PDEA) sa isinagawang buy-bust operation sa bahagi ng Barangay Dau, Mabalacat, Pampanga kamakalawa. Nasamsaman ng sampung plastic sachets ng shabu ang suspek na si P/Inspector Fernancio Sampung ng Northern Police District at residente ng Plaridel 1, Angeles City.

Nadakma rin ang dalawang kasama ni Sampung na sina Herminio Manalong at Evelyn Albares. Ayon sa ulat ni P/Chief Inspector Moises Villaceran na isinumite kay P/Sr. Supt. Salvador Manga, hepe ng Region 3 CIDG, ang mga suspek ay may ilang linggo nang minamatyagan sa pagtutulak ng droga hanggang sa isagawa ang buy bust. (Ulat ni Resty Salvador)