Financier ng Casino Filipino itinumba

OLONGAPO CITY – Pinagbabaril hanggang sa mapatay ang isang 64-anyos na financier ng Casino Filipino ng dalawang hindi kilalang lalaki habang ang biktima ay bumisita sa pag-aaring plantasyon sa bahagi ng Barangay New Cabalan sa Olongapo City kamakalawa ng gabi. Dalawang tama ng bala ng baril sa ulo at dibdib ang tumapos sa buhay ni Alberto Asunsion ng Caron Street sa Barangay West Bajac-Bajac, Olongapo City.

Lumitaw sa imbestigasyon ng pulisya, huling namataang buhay ang biktima na lumabas ng Casino Filipino bandang alas-10:30 ng gabi at nagdesisyong bisitahin ang kanyang plantasyon sa nabanggit na barangay.

Hindi naman akalain ng biktima na sinundan siya ng dalawang naka-bonnet na lalaki at inupakan ng dalawang putok sa katawan na ikinasawi nito.

Tinangay ng mga killer ang dalawang gintong singsing at pitakang naglalaman ng hindi nabatid na halaga ng biktima saka tumakas sakay ng van na walang plaka.

May teorya ang pulisya na pinalitaw ng mga killer na pagnanakaw ang motibo upang iligaw ang pulisya sa imbestigasyon. Pinaniniwalaang may kaugnayan sa trabaho ng biktima bilang financier ng Casino Filipino ang kasalukuyang sinisilip na anggulo ng krimen. (Ulat nina Jeff Tombado at Ric Sapnu)