6 holdaper nalambat

CAVITE – Anim na kalalakihan na pinaniniwalaang kasapi ng grupong "Banson" robbery-hold-up gang ang nasakote ng mga tauhan ng pulisya sa isinagawang operasyon sa Barangay Halang, Calamba City, Laguna, kamakalawa. Kabilang sa dinakip ng pulisya ay nakilalang sina: Bartolome Dichoso; Erwin Banson, 26, lider ng grupo; Randy Panggas, 28; Joel Buarao, 24; Arsenio Ulat, 34 at Fernando Saulog. Nasamsam sa mga suspek ang isang Besta van na may plakang UGW-524, P320,000 cash, at iba’t ibang uri ng malalakas na kalibre ng baril.

Ayon kay P/Supt. Benjardie Mantele, ang mga suspek ay responsable sa panghoholdap sa Lagamayo Telecom sa Barangay Sampalok 1, Dasmariñas, Cavite. (Ulat nina Cristina Timbang at Lolit Yamsuan)