Mag-utol ibinaon sa imburnal

CAVITE – Tinaniman ng bala sa katawan at ibinaon sa imburnal ang mag-utol na lalaki ng mga hindi kilalang lalaki makaraang mapagkamalang magnanakaw sa bakanteng subdibisyon sa pagitan ng Barangay Timalan at Barangay Balsahan, Naic, Cavite kamakalawa.

Halos hindi na makilala ang pagkatao ng mga biktimang sina Joel, 35 at Jori Araneta, 30, ng Sitio Lontoc ng nabanggit na barangay.

Base sa impormasyong nakalap ni PO2 Dario Carangalan, huling namataan ang mag-utol sa bakanteng subdibisyon ng Coastal City na nangunguha ng gulay at suso sa bahagi ng ilog at napaulat na nawawala, noong Mayo 29, 2005. Bandang alas-onse ng umaga nang madiskubre sa imburnal ng ilang residente ang bangkay ng mag-utol na walang saplot sa katawan maliban sa kapwa tadtad ng tama ng bala sa katawan. May teorya ang mga imbestigador ng pulisya na inakalang nagnanakaw ang mga biktima sa nasabing lugar kaya pinatahimik.

Sinisilip naman ng mga tauhan ng pulisya ang partisipasyon sa krimen ng ilang security guard sa nasabing subdibisyon. (Ulat ni Lolit Yamsuan)