Sa ulat na nakalap kahapon sa tanggapan ni Army Chief Lt. Gen. Generoso Senga, dakong alas-9 ng umaga nang makasagupa ng tropa ng Scout Rangers sa ilalim ng superbisyon ni Brig. Gen. Danilo Lim ang grupo ng NPA sa Andap Valley, Brgy., Buhisan, San Agustin ng nasabing lalawigan.
Napilitan namang umatras sa sagupaan ang grupo ng mga rebelde matapos na mapaslang ang apat sa kanilang mga kasamahan na inaalam pa ang pagkakakilanlan habang wala namang nasugatan sa panig ng tropa ng militar.
Sa isinagawang clearing operations ay narekober sa loob ng isang kuweba ang isang trak ng eksplosibo na pinaniniwalaang gagamitin ng mga rebelde sa paghahasik ng terorismo.
Kabilang sa mga nasamsam ay isang M14 rifle, 7.62 FAL rifle, dalawang cal. 38 revolvers, apat na sako ng detonating cord, isang bar ng cutter, electric stand drill, isang acetylene set, computer printer, dalawang generator set, mga subersibong dokumento at mga personal na kagamitan. (Ulat ni Joy Cantos)