2 konsehal, di pinayagan ng korte na manungkulan

SOLANO, Nueva Vizcaya – Dalawang konsehal na miyembro ng Sanguniang Bayan ang hinarangan ng Regional Trial Court kamakalawa na manungkulan dahil kwestiyonableng appointments ng dalawa bilang bahagi ng municipal council sa bayang ito.

Ang dalawang miyembro ng council na binigyan ng temporary restraining order (TRO) ni Judge Jose Rosales ng RTC Branch 27-Bayombong ng 72-oras ay sina Ferdinand Beting at Philami Galima-Uy Lim na inatasang huwag munang makibahagi sa kanilang lingguhang regular session.

Sina Beting at Uy ay kapwa nominado ng LDP na isalang sa dalawang bakanteng posisyon dahil sa pagkamatay ni Councilor Cely Beting noong Jan. 29, 2005 at ang pag-angat naman ni Councilor Helen Dacayo na ngayon ay vice mayor dahil naman sa pagkamatay ni dating Mayor Heraldo Dacayo noong 2004.

Napag-alamang si Governor Luisa Lloren-Cuaresma, LDP member, ang nag-apruba sa appointment nina Beting at Uy na binabatikos naman ng partido Lakas.

Nabatid na maituturing na independent party ang LDP dito matapos nilang suportahan ang Lacson Wing noong panahon ng eleksyon at hindi ang LDP-Angara wing. (Ulat ni Victor P. Martin)