Ang biktima na agarang namatay sanhi ng dalawang tama ng bala sa ulo mula sa cal. 22 kalibre ng magnum ay nakilalang si PO2 Eduardo Correa, 35-anyos, nakatalaga sa Las Piñas Mobile Patrol Unit at residente ng Sitio Igiban, Brgy. Sta. Cruz, Antipolo City.
Ayon kay SPO1 Rodel Semacio, may hawak ng kaso, naganap ang insidente dakong alas-10:00 ng umaga sa kahabaan ng Marcos highway, Brgy. Mayamot ng naturang siyudad.
Nabatid na pauwi na sa kanilang tahanan ang biktima galing sa duty sakay ng isang pampasaherong jeepney na may plakang NXW -918 kasama ang ilang pasahero ng maglabas ng baril ang mga suspek at magdeklara ng holdap.
Habang nililimas ng mga suspek ang pera at mahahalagang gamit ng mga pasahero ay napansin ng isa sa mga ito ang nakabukol na baril sa beywang ng biktima kaya mabilis itong pinaputukan ng dalawang beses sa ulo na naging sanhi ng agarang kamatayan nito.
Matapos ang panghoholdap ay mabilis na nagsitakas ang mga suspek. Nagsasagawa na ng malawakang manhunt operation ang pulisya ng Antipolo laban sa naturang grupo ng mga holdaper. (Edwin Balasa)