13-anyos ni-rape ng adik

ANGELES CITY, Pampanga – Naging masaklap ang naging kapalaran ng isang menor-de-edad na babae makaraang mapariwara sa kamay ng kapitbahay na adik na lalaki sa loob ng bakanteng kubo sa Barangay Cacutud sa lungsod na ito, ayon sa ulat ng pulisya.

Luhaang dumulog sa himpilan ng pulisya sa Angeles City ang biktimang itinago sa pangalang Susan, grade six pupil upang ireklamo ng kasong rape ang suspek na si Nelson Rodriguez, 18, ng nabanggit na barangay.

Sa salaysay ng biktima sa pulisya, bandang alas-10 ng gabi nang harangin siya ng suspek habang naglalakad patungo sa kanyang kaibigan.

Ayon sa pulisya, tinakot ang biktima kaya madaling dinala sa bakanteng kubo at naisagawa ang maitim na balak. Pinawalan din ang biktima sa pangakong hindi magsusumbong sa mga awtoridad. Kasalukuyan namang tinutugis ang suspek sa hindi binanggit na barangay. (Ulat ni Resty Salvador)