2 CAFGU grabe sa pagsabog ng granada

Camp Aguinaldo – Dalawang miyembro ng Citizen’s Armed Forces Geographical Unit (CAFGU) ang malubhang nasugatan matapos sumabog ang inihagis na granada ng mga pinaghihinalaang kasapi ng New People’s Army (NPA) sa tahanan ng isang anti-communist leader sa Davao City kamakalawa.

Ang mga biktima na kinilalang sina Rolando Manulang at Nestor Atolor ay mabilis na isinugod sa Davao Medical Center para malapatan ng lunas.

Sa ulat na nakarating sa tanggapan ni Armed Forces of the Philippines (AFP) Chief of Staff Gen. Narciso Abaya, bandang alas-4:30 ng madaling-araw nang maganap ang insidente sa tahanan ng anti-communist leader na si Datu Rubin Labawan sa Block 31, Lot 32, Peter St., Phase 2, Emily Homes, Buhangin ng lungsod na ito

Nabatid na mahimbing na natutulog ang mga biktima nang biglang sumulpot sa lugar ang dalawang kahinahinalang kalalakihan na lulan ng motorsiklo at hagisan ang mga ito ng granada saka mabilis na tumakas sa lugar.

Narekober sa pinangyarihan ng pagsabog ang dalawang safety lever at isang fuse ng handgrenade. (Joy Cantos)