Hindi na umabot pa ng buhay sa Amang Rodriguez Medical Center ang mga biktimang sina: Ronald Cruz, 30 at Edgar Salcedo, 34; habang si Mario Surera naman ay ginagamot sanhi ng maraming tama ng shrapnel sa iba’t ibang bahagi ng katawan.
Base sa ulat na isinumite kay Police Senior Superintendent Leocadio Santiago, provincial police director, nagtungo ang dalawang biktimang nasawi sa bahay ni Surera upang manghiram ng lagare para sa napulot na sinaunang bomba.
Agad naman pinahiram ni Surera sa dalawa ang lagare at sinamahan pa nito sa likod-bahay upang tulungang lagariin ang bomba.
Sa impormasyong nakalap ng pulisya sa mga kapitbahay ng biktima, na inakala ng tatlo na hindi na marahil sasabog ang bomba sa pag-aakalang masyadong sinauna at kinakalawang na ay pinagtulungan ng tatlo na umpisahan ang paglagare.
Bandang alas-8:30 ng umaga nang makarinig ng malakas na pagsabog ang mga kapitbahay.
Agad namang tinungo ng mga kapitbahay ang likurang bahagi ng bahay ni Surera at lumantad sa kanila ay ang duguang katawan ng tatlo.
Pinagtulungan namang isugod sa nasabing ospital ang tatlo, subalit idineklarang patay sina Cruz at Salceda. (Ulat ni Edwin Balasa)