Hapon kalaboso sa pambubugbog

Camp Crame – Bagsak kalaboso ang isang Japanese national matapos itong masangkot sa pambubugbog ng isang konsehal at opisyal ng bangko matapos maglaro ng golf dahil sa mainitang pagtatalo sa Davao City kamakalawa.

Kinilala ang suspek na si Kenichi Karino, 41-anyos, tubong Saitama, Japan at pansamantalang nanunuluyan sa Gulf View Subdivision sa Brgy. Bago Aplaya ng lungsod na ito.

Ang nasabing Japanese national ay inaresto ng Davao City Police matapos ireklamo ng dalawang biktima na kinilalang sina Councilor Bonifacio Militar at Domingo Ramos Jr., pangulo ng sangay ng Equitable Bank sa Davao at pawang nakalaro ng suspek sa larong golf.

Nabatid na kasalukuyang naglalaro ng golf ang tatlo sa Apo Golf and Country Club sa Bago Aplaya ng magkaroon ng mainitang pagtatalo sa pagitan ng mga ito na humantong sa pamamalo ng dayuhan sa dalawang biktima.

Kasalukuyan na ngayong humihimas ng rehas na bakal ang suspek sa Davao City Jail habang ipinabeberipika na rin ng dalawang biktima sa Bureau of Immigration ang rekord nito upang alamin kung legal ang pananatili nito sa bansa. (Ulat ni Joy Cantos)