Estudyante nasalpok ng bus

NUEVA ECIJA – Isang 16-anyos na batang lalaki ang iniulat na nasawi makaraang mabundol ng mini bus habang pinupulot ang nahulog na tsinelas sa kahabaan ng Nueva Ecija-Aurora Road na sakop ng Sitio Salubungan, Barangay Imelda Valley, Palayan City kamakalawa ng hapon.

Binawian ng buhay sa ospital ang biktimang si Bernardo Leaño y Olimon, 4th year high school at naninirahan sa Barangay Bagong Sikat, Cabanatuan City. Ang biktima na nakasakay sa handtractor at sa hindi inaasahang pagkakataon ay nahulog ang suot nitong tsinelas kaya agad na bumaba. Hindi naman napansin ng drayber ng Eugene Transport Bus (CVC-986) na si Carlos Mariano kaya naganap ang sakuna. (Ulat ni Christian Ryan Sta. Ana)