Illegal recruiter timbog

TARLAC CITY – Isa sa tatlong illegal recruiter na pinaniniwalaang bumiktima ng labinlimang Overseas Filipino Workers (OFW) sa Brunei ang nasakote ng mga tauhan ng National Bureau of Investigation (NBI) kahapon. Ang pagkakadakip kay Ernesto Yarcia ng Barangay Burgos, Moncada, Tarlac ay bunsod ng ipinalabas na warrant of arrest ni Judge Cesar M. Sotero ng Panique, Tarlac Regional Trial Court Branch 67. Humingi na ng tulong ang mga biktima sa pamunuan ng Department of Foreign Affairs at Bureau of Immigration upang madakip ang dalawa pang suspek na sina: Zenaida Bartolome Tessie dela Peña na kapwa nasa Brunei. Napag-alaman pa sa ulat na hiningan ng P65,000 hanggang P120,000 ang mga biktima kapalit ng trabaho sa Brunei, ngunit umabot na ng tatlong buwan ay walang maibigay na mapapasukan sa naturang bansa. (Ulat ni Ellen Fernando)