Nakilala ang biktima na si Gina Ante ng Ma-a, Davao City na agad namatay bunsod ng tinamong 11 tama ng saksak sa leeg at dibdib.
Agad namang nasakote sa follow-up operations ang suspek na kinilalang si Christopher Cabalhin, 23-anyos, tubong Trento, Agusan del Sur at nagtatrabaho sa Times Beach sa Matina, Davao City.
Sa report, naitala ang krimen dakong alas -3:35 ng madaling-araw nang makipagkita ang biktima sa kaniyang nobyo sa nabanggit na beach resort.
Nagsasagawa umano ng pagpapatrulya ang ilang volunteer group at brgy. tanod sa nasabing lugar nang makita nila ang suspek na nakapatong pa sa hubad at duguang katawan ng biktima.
Bunsod nito’y nagtatakbo patakas ang suspek pero makalipas ang ilang minutong habulan ay nasukol rin ng mga barangay tanod at agad itinurn-over sa kustodya ng pulisya.
Lumilitaw sa imbestigasyon na palaging inaaway ng suspek ang biktima dahilan sa seloso umano ito. Kasalukuyan na ngayong humihimas ng rehas na bakal ang suspek habang inihahanda na ang pagsasampa ng kasong kriminal laban dito. (Ulat ni Angie dela Cruz)