3 grabe sa nag-amok na adik

Isabela – Tatlong miyembro ng pamilya kabilang ang isang buntis ng ginang ang grabeng nasugatan nang mapagtripang pagsasaksakin ng isang nag-amok na lalaki na pinaniniwalaang bangag sa droga sa Santiago City ng lalawigang ito kamakalawa.

Kinilala ang mga biktima na sina Christian Mianga Jr., na namemeligrong mabulag dahilan sa tinamong malalim na saksak sa mga mata; Abe Mianga at Marmelyn del Fiero Mianga, 22 anyos; isang buntis na ginang na muntik ng mapaanak.

Agad namang nasakote ang suspek na kinilalang si Edison Cabungcal, umano’y isang kilalang drug addict sa lugar at kapitbahay ng mga biktima.

Nabatid na bandang alas-10:30 ng gabi ng maganap ang insidente sa Sitio Tramo, Brgy. Malvar, Santiago City habang ang mga biktima ay naghahanda na para matulog nang puwersahang pasukin ng suspek ang kanilang tahanan at pagsasaksakin ang mga ito. Sa matinding takot ay muntik ng mapaanak ang ginang.

Nagtangka umanong tumakas ang suspek pero minalas na masakote ng mga nagrespondeng elemento ng Santiago City Police. (Ulat ni Erickson Lovino)