Ex-mayor na pumatay sa karibal lumantad

Tayug, Pangasinan – Matapos ang ilang buwang pagtatago sa batas, lumantad na si dating Mayor Marius Ladio, itinuturong pangunahing suspek sa pagpaslang sa kaniyang karibal sa pulitika sa bayang ito.

Kasabay nito ay itinanggi naman ng suspek na siya ang may kagagawan sa pagpatay sa biktimang si Mayor Guerrero Zaragoza na naganap sa isang sabungan nitong nakalipas na Hunyo 22 ng taong ito.

Sa panayam ng mediamen sa tahanan ni Ladio sa Brgy. Evangelista pinabulaanan din nito ang napaulat na sumapi na siya sa kilusan ng New People’s Army (NPA).

Ikinatwiran ni Ladio na hindi umano makatarungan na basta na lamang siyang paratangan ng walang sapat na ebidensiya dahilan kung tutuusin ay marami ring kaaway ang biktima.

Sinabi pa ng dating alkalde na kung umalis man sila ng kaniyang pamilya sa kanilang lugar at pansamantalang lumipat sa Metro Manila ay upang makaiwas lamang sa gulo. (Ulat ni Eva Visperas)