Munisipyo sinalakay, sinunog ng NPA rebs

CAMP AGUINALDO – Sinalakay ng mga rebeldeng New People’s Army (NPA) ang munisipyo ng bayan ng Esperanza bago pinasabog na lumikha ng malaking sunog sa panibagong insidente nang paghahasik ng terorismo sa lalawigan ng Masbate kamakalawa.

Batay sa ulat na nakalap kahapon sa tanggapan ni Army Chief Lt. Gen. Gregorio Camiling Jr., dakong alas-7:45 ng umaga nang lusubin ng mga rebelde ang himpilan ng pulisya ng Esperanza, Masbate.

Agad pinalibutan ng mga rebelde ang nasabing munisipyo kung saan ay gumamit ang mga ito ng mga pampasabog sa isinagawa nilang panununog.

Niyanig ng sunud-sunod na pagsabog ang nasabing munisipyo hanggang sa lumikha ito ng apoy at kumalat sa katabing mga tanggapan.

Ayon pa sa ulat, aabot sa P1 milyong ari-arian ang napinsala matapos na kumalat ang apoy na tumupok sa tanggapan ng Department of Interior and Local Government (DILG), Municipal Agrarian Office, Social Welfare Development, Municipal Disaster Council, Accounting Office, Comelec at istasyon ng pulisya sa nasabing bayan.

Wala namang nagawa ang mga nagbabantay na pulis dahil higit na nakararami ang grupo ng mga umatakeng rebelde.

Tumagal lamang ng ilang minuto ang paghahasik ng karahasan ng mga rebelde bago tumakas patungo sa hindi pa malamang destinasyon.

Naglunsad na ng hot pursuit operations ang mga elemento ng Army’s 901st Infantry Brigade at mga tauhan ng pulisya laban sa grupo ng mga rebelde na responsable sa insidente. -(Ulat nina Joy Cantos at Ed Casulla)