P20-M ari-arian sinunog ng NPA

CAMP AGUINALDO – Sinalakay ng mga New People’s Army (NPA) ang isang contruction company kung saan sinunog ang may P20 milyon sa panibagong paghahasik ng terorismo sa New Bataan, Compostela Valley kahapon ng umaga.

Ayon kay AFP Public Information Officer Lt. Col. Daniel Lucero, bandang alas-12:30 ng umaga nang lusubin ng aabot sa 100 rebelde ang loob ng Sebastian Construction Corporation na matatagpuan sa pagitan ng Barangay Bantacan at San Roque sa nasabing bayan.

Tinutukan ng baril ng mga rebelde ang nagbabantay na security guard at agad tinungo sa mga construction equipments sa kabila ng pakiusap ng mga empleyado dito.

Binuhusan ng gasolina ang palibot ng mga heavy equipment at saka tuluyang sinilaban.

Kabilang sa mga nasunog na kagamitan ay ang tractor, payloader at bulldozer na tinatayang aabot sa P20 milyon.

May teorya ang pulisya na tumatanggi ang may-ari na magbigay ng revolutionary tax. (Ulat ni Joy Cantos)