Pulis todas sa pagresponde sa nakawan

CAMP CRAME – Isang pulis ang iniulat na napatay makaraang makabarilan ang dalawang notoryus na holdaper na nanloob sa convenience store sa Dumaguete City, Negros Oriental, kamakalawa.

Idineklarang patay sa Holy Child Hospital si PO1 Richito Badilles, nakatalaga sa Jimalalud municipal police station ng nabanggit na lalawigan.

Kasalukuyang namimili sa convenience store si PO1 Badilles nang magdeklara ng holdap ang dalawang armadong suspek.

Batay sa ulat, bandang alas-6 ng gabi nang maganap ang shootout sa Pacifica Barato convenience store sa panulukan ng Mabini at Pinili St.Agad na tinutukan ng baril at inutusan ng mga holdaper ang kahera na ibigay sa kanila ang kinita na di naman napapansin na nasa gawing dulo si Badilles.

Bunga ng matinding takot at pagkataranta ay nagtatakbo ang cashier na si Ivy Aligado kung saan matapos na mapansin ni Badilles ang kaguluhan ay agad itong sumaklolo.

Agad na pinaputukan ng mga suspek si Badilles habang palapit at ilang minutong palitan ng putok ang nangyari saka bumulagta ang biktima. (Ulat ni Joy Cantos)