SULYAP BALITA

2 Patay Sa Holdaper

Pinaniniwalaang pumalag sa mga holdaper ang isang 49-anyos na lalaki kaya pinagtulungang saksakin hanggang sa mapatay, samantala, isa namang trader ang iniulat na napatay din ng holdaper sa naganap na karahasan sa magkahiwalay na lalawigan.

Walang buhay na bumulagta ang biktimang si Romulo Bueno, 49, binata ng Barangay Bombon, Tabaco City, Albay matapos na pumalag sa mga holdaper ng cellphone sa ikalawang palapag ng Tabaco Supermarket kamakalawa.

Samantala, isa namang negosyante na nakilalang si Reynaldo dela Fuente, 44, may asawa, ang tinodas ng tatlong holdaper na nakabisikleta sa Barangay Panapaan I, Bacoor, Cavite kahapon ng madaling-araw, ayon sa ulat ng pulisya. (Ulat nina Ed Casulla at Cristina G. Timbang)

Puganteng Arsonist Nalambat

ROXAS, Palawan – Isang puganteng arsonist ang iniulat na muling nadakip ng mga tauhan ng Army Special Forces team at mga opisyal ng barangay makaraang magbantang susunugin ang bahay ng kanyang magulang sa Sitio Dioran, Barangay Mendoza sa bayang ito noong Agosto 7 ng umaga.

Ang pugante na muling ikinulong sa Roxas municipal jail ay nakilalang si Jose Villarobe Jr. at may nakabinbin ding kaso ng panununog.

Hindi naman nabatid ng mga sundalo kung papaano nakapuga si Villarobe Jr. sa kanyang selda. (Ulat ni Arnell Ozaeta)

Kuya Tinodas Ng Utol

BORDEOS, Quezon – Nagmistulang karne ng hayop ang katawan ng isang 49-anyos na magsasaka makaraang pagsasaksakin ng sariling kapatid na lalaki habang natutulog sa kanilang bahay sa Barangay San Rafael ng bayang ito kamakalawa ng gabi.

Ang biktima na natagpuang tadtad ng saksak sa katawan ay nakilalang si Freddie Cardo Romero, may asawa, samantalang tumakas naman ang suspek na si Angelito, 42 na kapwa residente ng nasabing barangay.

May palagay ang pulisya na matinding galit ang umiral kaya naganap ang pamamaslang. (Ulat ni Tony Sandoval)

2 Dedo Sa Road Mishap

LUPAO, Nueva Ecija – Dalawa-katao ang iniulat na nasawi makaraang magsalpukan ang traysikel at motorsiklo sa kahabaan ng highway na sakop ng Barangay North sa bayang ito kamakalawa ng umaga.

Kapwa tumilapon ang mga biktimang sina Donato Madarang, 19 ng Barangay Poblacion East at Reggie Cacatian, 29 ng Barangay Poblacion Norte.

Sa ulat ng pulisya, naitala ang aksidente bandang alas10:30 ng umaga matapos na magsalubong ang trike (RM-9067) at motorsiklong walang plaka. (Ulat ni Christian Ryan Sta. Ana)