2 Kampo Ng Npa Nakubkob

CAMP AGUINALDO – Dalawang malaking kampo ng mga rebeldeng New People’s Army (NPA) Ang iniulat na nakubkob ng militar sa isinagawang magkahiwalay na operasyon sa Iloilo at Masbate kamakalawa.

Base sa ulat na isinumite kahapon sa Camp Aguinaldo, unang nakubkob ng Army’s 12th Infantry Battalion ang kampo ng mga rebelde sa liblib na bahagi ng Sitio Balikan, Barangay Garangan, Calinog, Iloilo.

Maaaring namalagi ang 50 rebelde sa nadiskubreng kampo at kasabay na natagpuan ang mga subersibong dokumento.

Sumunod namang nakubkob ng mga kawal ang Army’s 2nd Infantry Battalion ang kampo sa Kagubatang sakop ng Barangay Cabugao, San Fernando, Masbate makaraang magsagawa ng patrolyang pandigma.

Ayon pa sa ulat, nadiskubre ang kampo sa Barangay Cabugao matapos na madakip ang isang rebelde na si Ka Gerry na siyang nagturo sa militar. Ang kampo ay may apat na kubo at maaaring mamahay ang 30 rebelde. (Ulat ni Joy Cantos)