Informer itinumba ng NPA

RAGAY, Camarines Sur – Tinambangan at napatay ang isang 29-anyos na lalaki ng mga rebeldeng New People’s Army makaraang mapagkamalang nagbibigay ng impormasyon sa militar at pulisya sa mga ikinikilos ng makakaliwang kilusan sa Sitio Recta, Barangay Godofredo Reyes Sr., sa bayang ito kamakalawa ng gabi.

Si Elioterio Morom Jr. ay pinagbabaril hanggang sa mapatay ng apat na rebelde habang naglalakad papauwi sa naturang lugar.

Napag-alaman pa sa ulat ng pulisya na binalaan ng mga rebelde ang biktima sa kahina-hinalang ikinikilos nito sa pagbibigay ng impormasyon sa tropa ng pamahalaan pero binalewala nito ang banta.

Hindi na nagdalawang isip pa ang mga rebelde at itinumba ang biktima saka palakad na tumakas na animo’y walang nangyari. (Ulat ni Ed Casulla)