Sulyap Balita

P30-M palengke naabo sa sunog

CAMP CRAME – Umaabot sa P30-milyong ari-arian ang iniulat na tinupok ng apoy makaraang masunog ang dalawang palengke sa Isabela City, Basilan at Naga, Zamboanga Sibugay kamakalawa.

Unang nasunog ang pamilihang bayan sa Isabela City dakong alas-2 ng madaling-araw at tumagal ng limang oras bago pa maapula ang pagkalat ng apoy dahil sa kakulangan ng tubig.

Sa naantalang ulat naman ay nagsimula ang sunog sa tindahan na pag-aari ni Mr. Raluyo bago tuluyang kumalat ang apoy sa loob ng palengke sa Naga bandang ala-1:30 ng madaling-araw.

Wala namang iniulat na nasawi o nasugatan sa naganap na magkahiwalay na sunog. (Ulat ni Danilo Garcia)

Ex- CAFGU itinumba ng NPA rebels

CAMP SIMEON OLA – Isang dating miyembro ng Civilian Armed Forces Geographical Unit (CAFGU) ang iniulat na pinagbabaril hanggang sa mapatay ng mga rebeldeng New People’s Army (NPA) habang ang biktima ay nagpapahinga sa harap ng sariling bahay sa Barangay San Pedro, Irosin, Sorsogon kamakalawa ng hapon.

Bandang ala-1:30 ng hapon nang ratratin si Rogerio Rayandayan, 61, ng tatlong armadong rebelde habang nakahiga sa harap ng sariling bahay.

May palagay ang pulisya na iniuugnay ang pamamaslang sa dating trabaho ng biktima bilang paramilitary na lumalaban sa mga rebelde. (Ulat ni Ed Casulla)

1 dedo, 2 grabe sa road mishap

TALAVERA, Nueva Ecija – Isa ang nasawi, samantala, dalawa naman ang malubhang nasugatan makaraang salpukin ng dyip ang sinasakyang mga bisikleta ng biktima sa kahabaan ng highway na sakop, ng Barangay San Ricardo sa bayang ito noong Lunes ng gabi.

Si Laureano Ramos, 43, ng Barangay Casile, Llanera, Nueva Ecija ay namatay sa pinangyarihan ng aksidente, samantala, sina Jose Peregrino, 26, ng Barangay Matayong-Tayong, Capas, Tarlac at Victor Ayuste, 39 ay inoobserbahan sa Dr. Paulino J. Garcia Extention Hospital.

Naitala ng pulisya ang pangyayari dakong alas-6 ng gabi, hindi naman nakuha ang numero ng plaka ng dyip dahil sa pinaharurot ng driver. (Ulat ni Christian Ryan Sta. Ana)