Task Force Davao binuo

CAMP AGUINALDO – Binuo kahapon ng Armed Forces of the Philippines (AFP) ang Task Force Davao alinsunod sa kautusan ni Pangulong Arroyo para sawatain ang "state of lawlessness" dito.

Sinabi ni Defense Sec. Angelo Reyes, ang TF Davao ay pamumunuan ni Col. Rodolfo Obaniana, commander ng 701st Brigade ng Philippine Army. May 450 sundalo ang ide-deploy sa Davao upang pigilan ang anumang aktibidad ng terorismo dito.

Ayon kay Reyes, ang pangunahing layunin ng TF Davao ay pangalagaan ang seguridad ng lungsod upang hindi na maulit ang pangyayari sa Sasa wharf at Davao airport na pawang pinasabog ng mga terorista.

Samantala, ilalatag din ng PNP ang Integrated Security System (ISS) sa mga pangunahing sea ports sa bansa at mga establisimento ng pamahalaan para hindi na maulit ang naganap na pambobomba sa Davao na kagagawan ng mga terorista. (Ulat ni Joy Cantos)