Pulis sugatan sa pugante

CAMP CRAME – Isang pulis ang nasugatan makaraang manlaban ang aarestuhin nitong mga pugante kamakalawa ng madaling araw sa Balabac, Palawan.

Ang nasugatang pulis ay nakilalang si PO2 Gregorio Echague III at nakatalaga sa Balabac police station.

Batay sa ulat, bandang alas-5 ng madaling-araw nang makasagupa ng mga pulis ang grupo ng mga pugante sa pangunguna ng no. 1 most wanted person ng Balabac na si Taseron Taupan sa Sitio Calugcog, Bgy. Ramos ng nasabing bayan.

Sa kabila ng warning shot ng pulisya, ay nanlaban ang mga puganteng tumakas mula sa Balabac detention cell kamakailan.

Nasugatan sa nasabing engkwentro si PO2 Echague habang pinaniniwalaang marami din sa mga pugante ang nasugatan dahil sa mga naiwang patak ng dugo sa pinangyarihan ng insidente.

Dalawang Malaysian ID ang nakuha sa loob ng naiwang belt bag, 3 piraso ng medalyon at isang motorized banca. (Ulat ni Joy Cantos)