Lover ni misis tinodas ni mister

LUCENA CITY, Quezon – May posibilidad na matinding selos ang umiral para saksakin hanggang sa mapatay ang isang traysikel driver ng kanyang kabaro sa panulukan ng Profugo at Abellanosa Street sa lungsod na ito kamakalawa ng gabi.

Binawian ng buhay habang ginagamot sa Quezon Memorial Hospital si Cresenciano Par, 22, binata ng Purok Tulungan Landing, Barangay Ibabang Iyam ng naturang lugar.

Samantala, ang suspek na nakilalang si Diosdado Banbe ay agad na tumakas matapos ang krimen dakong alas-9 ng gabi.

Ayon kay SPO1 Renato Pelobello, patraydor na nilapitan ng suspek ang biktima saka inundayan ng sunud-sunod na saksak sa likurang bahagi ng katawan.

Nabatid pa na nadiskubre sa wallet ng biktima ang love letter mula sa isang alyas na grace na pinaniniwalaang asawa ng suspek.

Bago pa maganap ang krimen ay nauulinigan na ng suspek ang kumakalat na balitang may relasyon ang biktima sa kanyang asawa.

Hndi nito pinansin ang balita hanggang sa mairita sa mga naririnig na kuwentuhan ng kanyang kapwa traysikel drayber kaya napilitang isagawa ang krimen. (Ulat ni Tony Sandoval)