Music composer tugis sa kasong murder

Nagsasagawa na ng malawakang pagtugis ang kapulisan ng Rizal laban sa isang 30-anyos na music composer na pinaniniwalaang responsable sa pagpatay sa kanyang live-in partner kamakalawa ng madaling-araw sa Cainta, Rizal.

Nakikipag-ugnayan na rin ang mga tauhan ni P/Chief Supt. Carlito Dimaano sa Bureau of Immigration and Deportation (BID) upang siguruhing hindi makalalabas ng bansa ang suspek na si Ezra Dave Maling, 30 at green card holder.

Napag-alaman pa sa ulat ng pulisya na may malakas na koneksyon ang suspek sa isang retiradong police general na residente ng Tanauan, Batangas.

Huling nakitang buhay ang biktimang si Rebeny Graceda, 24, ng 31 Main Street, Phase III, Vista Verde Country Homes, Barangay Sto. Domingo na kumakanta noong Linggo ng hatinggabi.

Ang bangkay ng biktima ay nadiskubre ng kanyang anak na si Alexandra Pauline, limang taong gulang bandang alas-6:45 ng umaga kamakalawa na sakal ng sinturon at may takip ng unan ang mukha na palatandaang pinahirapan muna bago pinaslang ng suspek. (Ulat ni Joy Cantos)