Ama pinatay ng sariling anak

TALAVERA, Nueva Ecija – Isang 71-anyos na ama ang kumpirmadong nasawi makaraang saksakin ng balisong ang biktima dahil sa pagkairita sa kanyang ama kamakalawa ng hapon sa Barangay La Torre.

Hindi na umabot pa ng buhay sa Maliwat Hospital ang biktimang si Felipe Villamar dahil sa malalim na tama ng patalim sa dibdib.

Mabilis namang tumakas ang suspek na si Romeo Villamar, 31, may asawa na pinaniniwalaang lango sa droga nang isagawa ang pamamaslang sa kanyang ama.

Sa nakalap na ulat kay P/Chief Insp. Sidney Villafor, chief of police ng Talavera, naitala ang krimen bandang ala-1:40 ng hapon matapos na komprontahin ng biktima ang kanyang anak dahil sa ginawang pananakit nito sa nakababatang kapatid na si Randy.

Ayon pa sa inisyal na imbestigasyon, nagkasagutan pa ang mag-ama hanggang sa humantong sa pananaksak ng suspek sa kanyang sariling ama. (Ulat ni Christian Ryan Sta. Ana)