Biktimang summary execution natagpuan

CAMP PANTALEON GARCIA, CAVITE – Isa na namang pinaniniwalaang biktima ng summary execution ang natagpuan ng pulisya na wasak ang mukha sanhi ng mga tama ng baril habang nakahandusay sa zigzag road ng Brgy. Sungay West, Tagaytay City kamakalawa ng hapon.

Gayunman, kasalukuyan pang bineberipika ng mga awtoridad ang pagkakakilanlan ng biktima.

Batay sa report ng pulisya, dakong alas 2:40 ng hapon nang matagpuan ng mga residente dito ang bangkay ng biktima sa madamong bahagi ng zigzag road ng nabanggit na lugar.

Napag-alaman na hirap ang pulisya na kilalanin ang biktima matapos na mawasak ang mukha nito sa tama ng bala.

Ayon sa teorya ng pulisya, posible umanong ang biktima ay sa ibang lugar pinaslang at dito lamang itinapon upang ilihis ang imbestigasyon.

Nanawagan naman ang pulisya sa sinumang nawawalan ng kamag-anak na makipagtulungan sa kanilang tanggapan upang mapabilis ang pagtukoy sa biktima. (Ulat ni Cristina Go-Timbang)