Sa ulat na isinumite ni P/Supt. Roger Nuneza sa Camp Crame, tatlo sa dalawampung hinostage ay nakilalang sina Wahad Kadatu, Ikong Andig at isang alyas Amman na pawang barangay kagawad ng Brgy. Dulag ng naturang lungsod.
Napag-alaman pa sa ulat na pinamunuan ng mag-utol na sina Bucari at Tongkoy Alindo ang isinagawang pagsalakay dakong alas-4:30 ng hapon sa nabanggit na barangay upang ipaghiganti ang kanilang kapatid na pinatay ng taga-Barangay Dulag.
Nagsimula ang kaguluhan makaraang tambangan at mapatay si Palao Alindo, 37, na utol nina Bucari at Tongkoy ng Barangay Malna, Kapai, Lanao del Sur noong Linggo ng hapon, Dec. 1, 2002 habang nagmomotorsiklo.
Sa salaysay ng asawang si Rica Alindo kay P/Insp. Andrew Gomez, police station commander, positibo nitong itinuro ang mag-asawang Ramirez Nato at Sonia Nato ang nasa likuran ng pamamaslang sa biktima.
Nagsimula ang banggaan ng dalawang pamilya makaraang pumasok sa politika ang kaanak ng Alindo at naging kaaway na ang pamilya Nato.
Nagbayad ng P.3-milyon blood money ang pamilya Alindo sa mga naulila ng biktima para maareglo na ang kaso ngunit gumanti naman ang mag-asawang Nato.
Sa kasalukuyan ay sumaklolo si Brgy. Chairman Bino Imbadir, kaanak ng pamilya Alindo sa pulisya at mga tauhan ng 30th Infantry Battalion ng Phil. Army upang makipagnegosasyon sa naganap na hostage drama.
Makaraan ang 10 oras na pakikipagnegosasyon ng mga awtoridad ay pinalaya rin ang 20 bihag ng mga armadong kalalakihan.(Ulat nina Danilo Garcia at Lino dela Cruz)