Sa ulat na nakarating sa tanggapan ni Bataan Provincial Police Office (BPPO) Director Sr. Supt. Sahiron Dulah Salim, dead-on-the-spot sa pinangyarihan ng sakuna ang mga biktima na kinilalang sina Hernan, 27 at ang asawa nitong si Crystal Velasco, 29, anak na si Mark Dave Velasco, 2; Analyn Acebedo, pawang mga residente ng Carmona, Cavite at Benjamin Ferrer, 30, ng Olongapo City.
Samantalang malubha namang isinugod sa James I. Gordon Memorial Hospital sa Olongapo City ang mga sugatang sina Fernando Batac, residente ng Barangay Sta. Barbara, Baliuag, Bulacan; Wilson Acebedo, Divina Velasco, Carl Acebedo, at Mark Jethro Acebedo, 3, pawang mga taga Carmona Cavite.
Ayon kay Dinalupihan-PNP station commander Sr. Insp. Rommel Velasco, naganap ang trahedya dakong ala-1 ng madaling araw kahapon habang lulan ang mga biktima ng black na Honda Civic (TFR-302) at binabagtas ang kahabaan ng National Highway, Barangay Saguing nang bigla na lamang silang salpukin ng Isuzu MU (4x4) na may plakang XCR 565.
Nabatid sa imbestigasyon na pilit umanong iniiwasan ng Isuzu ang isang lalaki na nagbibisikleta nang bigla itong nag-overtake at mawalan ng kontrol ang sasakyan hanggang sa mapadako ito sa kabilang linya at sumalpok sa sasakyan ng mga biktima. (Ulat ni Jeff Tombado)