Jailguard natakasan ng preso

BULAN, Sorsogon – Pinaniniwalaang kapabayaan ng isang escort ng Bureau of Jail Management and Penology (BJMP) ang pagkakatakas ng isang preso na may kasong murder habang nasa bus terminal sa Brgy. Zone 4 sa bayang ito patungong Sorsogon Provincial Jail kamakalawa ng umaga.

Si Carlos Gonzales na may kasong murder at residente ng Brgy. Roxas na nakaposas pa ay nakatiyempong pumuga bandang alas-9:30 ng umaga makaraang lumundag mula sa nakahimpil na bus dahil sa pagkakalingat ng kanyang escort.

Mabilis namang hinabol ng escort na si SJO2 Andre Gumba si Gonzales ngunit nakihalubilo na sa mataong lugar kaya hindi inabutan.

Nasa balag naman ng alanganin si Gumba na patawan ng kaukulang parusa dahil sa pagkakatakas ni Gonzales. (Ulat ni Ed Casulla)