Pulis patay sa kabaro

Isang bagitong pulis na nakatalaga sa Regional Mobile Group ng PRO-Cordillera Administrative Region (CAR) ang kumpirmadong nasawi makaraang mabaril ng kanyang kabaro sa naganap na mainitang pagtatalo kamakalawa ng hapon sa Cypress Village, Irisan, Baguio City.

Idineklarang patay sa Baguio City Hospital ang biktimang si PO1 Roger Esteras, samantala, ang suspek na hindi naman kaagad nakilala ay mabilis na tumakas matapos ang krimen.

Sa ulat na nakarating kahapon sa Camp Crame, naganap ang pangyayari dakong ala-1:00 ng hapon matapos magpambuno ang dalawa at maagaw ng biktima ang baril ng suspek ngunit sa hindi inaasahang pagkakataon ay biglang pumutok ang baril saka tumama ang bala sa katawan ni Esteras. (Ulat ni Danilo Garcia)