Iniwan ng lover nag-suicide

DASMARIÑAS, Cavite – Pinaniniwalaang naaburido ang isang 35-anyos na lalaki kaya nagpasyang mag-suicide sa pamamagitan nang pagbaril sa sarili makaraang iwanan ng live-in partner kamakalawa ng hapon sa Barangay Sta. Lucia sa bayang ito.

Si Orlando Fronda ng Block 113 Lot 5 ng nabanggit na barangay ay nagbaril sa sintido at natagpuan ng mga awtoridad dakong alas-3:30 ng hapon.

Sa impormasyon nakalap ni PO2 Valerio Bueno, dinamdam ng biktima ang paghihiwalay nila ng kanyang live-in partner na si Merly Bautista kaya malimit na walang kibo sa mga kapitbahay.

Hindi naman inaasahan ng mga kapitbahay na gagawin ng biktima ang pagpapakamatay at walang iniwang suicide note na natagpuan ang pulisya. (Ulat ni Cristina Go-Timbang)