Konsehal nilikida sa sabungan

CANDON CITY, Ilocos Sur – Pinagbabaril hanggang sa mapatay ang isang konsehal ng dalawang armadong lalaki na pinaniniwalaang bayarang mamamatay-tao habang ang biktima ay nasa loob ng sabungan noong Linggo.

Si Candon City Councilor Jaime Cobangco ay nagtamo ng tama ng bala ng kalibre 45 sa dibdib at likod na ikinasawi nito kaagad.

Naging brgy. chairman sa Bagar si Cobangco at nasa ikalawang termino na ng kanyang panunungkulan bilang konsehal ng naturang lungsod nang isagawa ang krimen sa harap ng maraming tao sa sabungan.

Kaagad naman nadakip ng mga alertong pulisya ang dalawang suspek na sina Rudy Velasco ng Lacao, Pangasinan at Eduardo Gambino ng Binalonan, Pangasinan.

Ayon sa pulisya, inaalam pa ang motibo ng krimen dahil sa ayaw makipag-cooperate sa kanila ang nadakip na dalawang suspek. (Ulat ni Teddy Molino)