300 CPLA sumanib sa militar

KAMPO MELCHOR DELA CRUZ, Isabela – Sumanib na sa tropa ng militar ang may 300 miyembro ng Cordillera People’s Liberation Army (CPLA) upang labanan ang tumataas na bilang ng mga rebeldeng New People’s Army (NPA) sa bayan ng Bugnay, Tinglayan at Kalinga sa naturang lalawigan.

Dahil sa nilagdaang Administrative Order No. 18 ni Pangulong Gloria Macapagal-Arroyo noong Sept. 2001 ay nagpasyang sumanib ang mga tauhan ni CPLA Chieftain James Sawatang sa tropa ng militar na nakabase sa Kampo Melchor dela Cruz sakay ng pitong army truck.

Malugod naman tinanggap ng militar kasama si Mayor Mailed Molina ang nagsisanib na miyembro ng CPLA na sasailalim sa masusing pagsasanay bago isabak sa mga rebeldeng NPA.

Samantala, ibinaon na sa limot ang hidwaan ng tribo ng Bituagan at Butbut sa isyu ng lupaing nasasakupan ng dalawang magkalabang tribo upang labanan ang mga rebelde. (Ulat ni Joe Dasig, Jr.)