2 ang mayor sa Baliuag, Bulacan

Dalawang alkalde sa bayan ng Baliuag, Bulacan ang kasalukuyang nakapuwesto dahil sa nakabinbing desisyon ng pamunuan ng Commission on Elections (COMELEC) na sampung araw na lamang ang ipaghihintay ng mga residente upang mapatunayan ang tunay na mayor.

Si Romeo Estrella na pinanumpa na ni Bulacan Regional Trial Court Judge Victoria Villalon-Pornillos Branch 10 bilang bagong alkalde ng naturang bayan ang kasalukuyang kinikilala ng mga residente.

Samantala, nagpalabas naman ng memorandum order si Bulacan Governor Josie Dela Cruz na kilalanin pa rin si Rolando Salvador na kasalukuyang alkalde hanggang hindi pa nakapagpapalabas ng desisyon ang Comelec.

Magugunitang nagpetisyon si Estrella sa korte na siya ang kilalaning nanalong alkalde ngunit humingi naman ng temporary restraining order (TRO) si Salvador sa Comelec upang hindi makaupo si Estrella.

Sa kabila ng naturang isyu ay naging normal naman ang naging kabuhayan ng mga residente dahil sa sinusuportahan naman ng mga residente sina Mayor Estrella at Mayor Salvador habang hinihintay ang ipalalabas na desisyon ng Comelec. (Ulat ni Efren Alcantara)