Graduating student nasalpok ng kotse, todas

DASMARIÑAS, Cavite – Isang graduating high school student ang nasawi, samantala, ang kasamang babae nito ay malubhang nasugatan makaraang salpukin ng kotse habang tumatawid sa kahabaan ng Aguinaldo Highway, Brgy. Zone 1 sa bayang ito kamakalawa ng gabi.

Binawian ng buhay habang ginagamot sa Phil. General Hospital ang biktimang si Neil Ryan Caldo, 17, estudyante ng Vel Maris School ng 67 Malihan St., Brgy. Zone 4, samantala, ang grabeng nasugatan ay si Evy Fabrid, 20, dalaga ng Block E-17 Lot 16, Brgy. San Mateo.

Nadakip naman kaagad ang driver na si Richard Handog, 20, binata, 3rd year college sa New Era University ng Brgy. Malagasang 2, Imus, Cavite.

Ayon kay PO1 Edgardo Gallardo, sinalpok ng Toyota Corolla (PLK-186) na minamaneho ng suspek ang dalawa bandang alas-11:30 ng gabi. (Ulat ni Cristina Go-Timbang)