Killer ng Lian mayor itinumba

LIAN, Batangas – Pinaniniwalaang itinumba ng mga hindi kilalang lalaki ang pangunahing suspek sa pagpatay kay Lian, Batangas Mayor Sixto Vergara noong Pebrero 8 na naunang napaulat na nag-suicide sa Catbalogan, Western Samar kamakalawa ng gabi.

Ito ang naging palagay ng mga kamag-anakan ni Lorenzo Tolentino dahil sa walang iniwang suicide note o anumang palatandaan na magpapakamatay ang killer ng mayor.

Napag-alaman sa isang napagkakatiwalaang source na ayaw ipabanggit ang pangalan na si Tolentino ay namataan ng mga hindi kilalang armadong kalalakihan na nasa labas ng kanyang bahay saka nilapitan at kinompronta.

Ayon pa sa ilang mga nakasaksi, ilang minuto pa lamang nakapapasok sa bahay si Tolentino kasama ang ilang lalaki ay nakarinig na sila ng isang putok bago nagsilabasan ang mga hindi kilalang lalaki.

May palagay ang source ng PSN na pinalalabas lamang ng pulisya na nag-suicide si Tolentino upang mapadali ang hustisya.

Sa natanggap na ulat ni Batangas PNP Provincial Director P/Chief Supt. Rolando Lorenzo sa Western Samar PNP, si Tolentino ay nagbaril sa sintido sa loob ng bahay sa Brgy. 9, ng naturang lugar.

Naunang nagpadala ng surrender feelers si Tolentino sa mga ahente ng Criminal Investigation and Detection Group (CIDG), ilang araw matapos niyang barilin at mapatay ang nabanggit na alkalde.

Binawian ng buhay si Mayor Vergara dahil sa tama ng bala ng baril sa dibdib at hita habang nilalapatan ng lunas sa Apacible Memorial District Horpital sa Nasugbu, Batangas.

Kasalukuyang nakaburol si Tolentino sa kanilang bahay sa Brgy. 4 at ihahatid ang labi nito ngayong araw ng Martes ngunit hindi kaagad naniniwala ang pamilya ni Mayor Vergara hanggang hindi nila nakikita ang bangkay ni Tolentino. (Ulat ni Ed Amoroso)