Bangka tumaob: Pari, sakristan nalunod

Isang paring Katoliko at sakristan nito ang iniulat na nalunod, samantalang nakaligtas naman sa tiyak na kamatayan ang operator ng bangkang tumaob na sinasakyan ng mga biktima sa karagatan ng Calunayan Point, Isabel, Leyte kamakalawa.

Kinilala ng Phil. Coast Guard ang mga biktimang sina Fr. Tito Patacsil ang sakristang nakilala lamang sa pangalang Noel, samantala, si Francisco Maratas na naisalba ay kasalukuyang ginagamot sa Leyte Provincial Hospital.

Si Maratas na noon ay lulutang-lulubog sa nabanggit na karagatan ay namataan ng mga tripulante ng M/V San Jose na naglalayag patungong Ormoc.

Lumalabas sa ulat mula kay Armand Balilio ng Phil. Coast Guard PIO, bandang ala-1 ng hapon nang salpukin ng dambuhalang alon ang sinasakyang bangkang-de-motor na M/BCA Mary Ann ng mga biktima na naglalayag patungong Merida, Leyte mula sa Pilar, Camotes Island.

Dahil sa lakas ng alon at hangin ay tumaob ang bangka ngunit nakaligtas si Maratas, samantala, pinaghahanap pa ng rescue worker ng Phil. Coast Guard ang dalawa na pinaniniwalaang nalunod sa nabanggit na karagatan. (Ulat ni Ed Amoroso)