Supervisor na nanita sa mag-utol pinatay

CABANATUAN CITY – Isang farm supervisor ang pinagsasaksak hanggang sa mapatay ng magkapatid makaraang sitahin na hindi nagtatrabaho ang mga ito sa loob ng Fernandez Poultry Farm sa Barangay Pangatian, kamakalawa ng hapon.

Kinilala ni P/Supt. Laverne Manangbao, hepe ng Cabanatuan City Police, ang biktima na si Efren Bancaya, 36, ng Barangay Padolina, General Tinio, Nueva Ecija.

Samantala, ang mga suspek ay ang magkapatid na Noel at Dennis Pascual kapwa stay-in helper sa nasabing poultry farm.

Sa imbestigasyon, lumalabas na dakong ala-1 ng hapon ay pinagalitan ni Bancaya ang magkapatid nang maaktuhan nito na hindi nagtatrabaho ay naglalasing pa.

Minasama umano ng magkapatid ang pagsita sa kanila ni Bancaya kaya’t nagawang pagtulungang saksakin ng mga ito hanggang sa mapatay ang biktima. (Ulat ni Christian Ryan Sta. Ana)