2 mag-asawang pusher timbog sa drug bust

KAMPO HEN. ALEJO SANTOS, Bulacan – Dalawang mag-asawang ‘tulak’ na pinaniniwalaang nagpapakalat ng droga sa kanilang lugar ang nalambat ng mga tauhan ng Bulacan PNP sa isinagawang drug bust operation sa Malolos at Baliwag, Bulacan kamakalawa ng umaga.

Kinilala ng pulisya ang mga nasakoteng drug pushers na mag-asawa na sina Theng Mukalam, 31 at asawang nitong si Sarah, 29 na kapwa residente ng Brgy. Culiat, Tandang Sora, Quezon City; ang mag-live-in na sina Teodoro Cruz, 35 at Marina Bernardo, 33 ng Brgy. Poblacion, Baliwag, Bulacan.

Sa isinumiteng ulat kay Bulacan PNP director P/Supt. Edgardo Acuña, nasakote ang mag-asawang Mukalam sa loob ng sikat na fast food chain sa Brgy. Ginhawa, Malolos, Bulacan dakong alas-10 ng umaga sa aktong nagbebenta ng droga sa isang pulis na nagpanggap na poseur buyer.

Samantala, sina Teodoro at Marina naman ay nalambat sa isinagawang buy bust operation sa Brgy. Poblacion, Baliwag, Bulacan.

Kasalukuyan pang inaalam ng pulisya ang pinagmulan ng shabu na ipinakakalat ng dalawang mag-asawang ‘drug pushers’ sa lalawigan ng Bulacan at karatig pook. (Ulat ni Efren Alcantara)