5 smuggled buses nasabat

SUBIC BAY FREEPORT – Limang bus na pawang mga "right-hand driven" vehicles na takda sanang ipuslit palabas ng Freeport ang nasabat ng pinagsanib na puwersa ng Law Enforcement Department (LED) at ng Intelligence and Investigation Office (IIO) ng Subic Bay Metropolitan Authority (SBMA) kamakalawa ng gabi.

Nasabat ng mga awtoridad habang papalapit sa may Tipo Road exit dakong alas-11 ng gabi at napigilan ang tangkang pagpuslit ng mga sasakyan palabas ng Freeport.

Sa isinumiteng ulat kay Major Robert Quenery, hepe ng IIO, kinilala ang mga driver ng mga smuggled buses na sina Lolito Obado, Jorge Navarro, ng Quezon City; Rosalino Rafanan ng Valenzuela City; Manuel Geronimo ng Cavite City at Ranulfo Parao ng Quezon City.

Ayon sa ulat ng pulisya, napag-alaman na ang mga drivers ay kapwa empleyado ng Bethany Trucking Corp. at CBBE Inc., na may office address sa Quezon City at Pandacan sa Maynila. (Ulat ni Jeff Tombado)