Mayor na nambastos ng 2 reporters, kinasuhan

LUCENA CITY – Pormal na sinampahan ng kasong physical injuries at abuse of authority ang isang alkalde sa bayan ng Pagbilao ng dalawang lokal reporters makaraan ang ginawang pambabastos at pananakit sa mga biktima noong Biyernes matapos na maganap ang isinagawang paglusob ng NPA rebels sa PNP detachment sa nabanggit na bayan.

Kinilala ang mga nagreklamong biktima sa Quezon PNP Provincial Office na sina Joey Perlas at Kid Maas, na pawang cameraman at reporter ng Channel 8.

Samantala, ang kinasuhan naman ay si Pagbilao Mayor Romar Portes.

Si Perlas ay hinampas umano ng armalite na hawak ni Mayor Portes habang si Maas naman ay pinitsarahan saka itinulak papalabas ng himpilan ng pulisya dahil nairita umano sa pagtatanong ng dalawa.

Sinigawan pa umano ang mga biktima ni Mayor Portes ng maanghang na salita na may kaugnayan sa paglusob ng NPA rebels sa naturang PNP detachment.

Kasunod nito, kinondena naman ng mga samahan ng mamamahayag na kinabibilangan ng Camp Nakar Press Corps, Lucena Tri-Media Group, Quezon Media Group ang ginawa ni Mayor Portes sa kanilang dalawang kasamahang reporters.

Pormal din magsasampa ng reklamo ang 2 reporters laban kay Mayor Portes sa pamunuan ng National Press Club (NPC) at kay DILG Secretary Joey Lina upang lapatan ng kaukulang parusa. (Ulat ni Tony Sandoval)