Misis utas sa sagasa ng truck

KAMPO HEN. ALEJO SANTOS, Bulacan – Isang 39-anyos ang iniulat na nasawi makaraang mabundol ng rumaragasang towing truck habang ang biktima ay sakay ng kanyang motorbike na bumabagtas sa kahabaan ng McArthur Highway, kamakalawa ng hapon sa Brgy. Lolomboy, Bocaue, Bulacan.

Ang biktima na hindi na umabot pa ng buhay sa ospital ay nakilalang si Esperanza Feliciano, may asawa ng Purok 2, Brgy. Ibayo, Marilao ng naturang lalawigan.

Samantala, ang driver ng sasakyan na may plakang CCJ-662 ay boluntaryong sumuko sa pulisya ay nakilalang si Pedro Paguio, 65, may asawa ng Brgy. Lias ng bayang ito.

Sa ulat na isinumite kay Bulacan Provincial PNP director P/Sr. Supt. Edgardo Acuña, naganap ang aksidente dakong alas-5:10 ng hapon makaraang lumusot ang biktima sa gilid ng towing truck na nagmamaneho ng kanyang motorbike na may plakang NS-9702.

Ayon pa sa ulat ng pulisya, bigla umanong kinabig ng driver ang minamanehong truck kaya nahagip ang biktima bago nasagasaan. (Ulat ni Efren Alcantara)