Police official patay sa car mishap

Hindi na umabot pa ng buhay sa pagamutan ang isang opisyal ng pulisya makaraang aksidenteng sumalpok ang sasakyan nito sa street marker sa kahabaan ng Brgy. Poblacion 1, Pura, Tarlac, ayon sa ulat ng pulisya kahapon.

Kinilala ang nasawing biktima na si SPO4 Avelino de la Cruz, 45, Deputy Chief of Police sa bayan ng Pura matapos na magtamo ng malubhang sugat sa naganap na aksidente.

Batay sa ulat na ipinarating kahapon ng Police Regional Office (PRO)) 3 sa Camp Crame, bandang alas-11:45 ng umaga habang binabagtas ng biktima lulan ng kanyang Anfra jeep na may plakang UJY-970 ang kahabaan ng Pura-Gerona Road ng Brgy. Poblacion 1, nang maganap ang insidente.

Ayon sa inisyal na imbestigasyon, katatapos lang ng opisyal na mag-ehersisyo sa Isidro Sports Complex kaugnay ng ipinatutupad na Physical Fitness Test Program ng PNP at pauwi na ito sa kanyang tahanan nang magloko ang sasakyan.

Sa bilis umano ng takbo ng sasakyan ay makailang ulit itong sumalpok sa street marker at tumaob kasama ang biktima. (Ulat ni Joy Cantos)