Mag-utol tiklo sa pabrika ng baril

CAMP PANTALEON GARCIA, Imus, Cavite — Tinatayang aabot sa sandaan (100) na iba’t ibang uri ng kalibre ng baril at bala ang nakumpiska ng mga operatiba ng Cavite PNP Criminal Investigation and Detection Group (CIDG) sa magkapatid na lalaki sa isinagawang pagsalakay sa kanilang bahay kamakalawa ng hapon sa Sitio Starfish, Brgy. Amaya 1, Tanza, Cavite.

Kinilala ng pulisya ang mag-utol na suspek na sina Federico, 47, at Angelito Eridao, 36, na kapwa may asawa ng nasabing barangay.

Ang pagsalakay ng mga tauhan ni P/Chief Insp. Eliseo dela Cruz sa pabrika ng baril ay bunsod na rin ng ipinalabas na Search Warrant ni Judge Lucenito Tagle ng Imus Regional Trial Court Branch 20 na may petsang July 12, 2001.

Napag-alaman pa sa ulat na bago isagawa ang pagsalakay sa nabanggit na lugar ay isinailalim muna ang mag-utol sa isang linggong surveillance at nagsagawa ng test-buy operation sa pamamagitan ng pagpapanggap ng isang ahente ng CIDG na maging poseur buyer.

Nabatid pa na naging positibo ang isinagawang test-buy operation kaya sinalakay ang bahay ng mga suspek. (Ulat ni Cristina Go-Timbang)